 |
Björg fæddist á fæðingarheimili Kópavogs 13. nóvember 1960. Foreldrar hennar voru Guðmundur Björgvin Guðmundsson, málarameistari og Kristólína P. S. Kristinsdóttir, húsfreyja. Björg var yngst af sjö systkynum. Hún fór snemma að vinna fyrir sér, fór strax á vinnumarkaðinn eftir skyldunámið.
Björg kynntist Kristjáni strax á unglingsaldri. 14. júlí 1984 giftust Björg og Kristján. Saman eignuðust þau tvær dætur, Stefaníu Eiríku og Evu Lind. Á silfurbrúðkaupsdaginn árið 2009 endurnýjuðu þau hjúskaparheitin.
Björg naut þess mjög að vera úti í náttúrunni og ferðuðust þau hjónin mikið. Björg vissi fátt betra en að vera með fjölskyldu sinni og það besta sem hún vissi var án efa barnabörnin fimm sem hún lætur eftir sig. Þau eru: Kristín Gyða, Hafdís Björg, Kristján Unnar, Vilhelm Breki og Bjarney Lilja. Björg var mjög mikið með þeim og naut þess að taka þau með sér upp í Þjórsárdal, þar sem þau hjónin eiga fallegt hjólhýsi og var það hennar uppáhaldsstaður. Björg og Kristján áttu margar góðar stundir í Þjórsárdalnum umvafin barnabörnum, fjölskyldu og vinum.
Björg bjó lengst af í Kópavogi og var hún ávalt mjög stolt af uppruna sínum. Árið 2006 greindist Björg fyrst með krabbamein, hún fór í margar aðgerðir vegna þess og árið 2009 greindist hún með MND, ólæknandi taugahrönunarsjúkdóm.
Undir lokin var Björg mjög búin að missa mátt. Hún var komin í rafmangshjólastól, átti erfitt með að borða sjálf og þurfti að nota rör til að drekka.
Björg lést á líknardeild Landsspítalans í Kópavogi 7. júní síðastliðinn eftir erfið veikindi einungis fimmtug að aldri.
Megi minning hennar vera ljós í hjarta okkar.
Nánari upplýsingar um Björgu má fá á: vtb.is |
